ناس قلابة و سما وهابة

 ناس قلابة و سما وهابة .. د. مجدي إسحق 

دنيا ناسها كدابة ، غضّابة ، دحلابة ، قلابة ..

يوم يرفعوك و يوم يرموك ، يوم يضحكوك و يوم يبكوك، يوم يدوك امان و في ضهرك يغدروا بيك ..

في الوش كلام و ابتسام، و في الغيبة حقد و حسد و انتقام ..

ناس ما لهاش غير مصالحها ، و يفصلوا الكلام علي قد المقام، لو خافوا منك يعملوا لك ألف حساب ، و لو استقلوا بيك يبيعوك و يبلعوك و ضميرهم مرتاح ..

يتلموا مع بعض في الغلط ضد الحق ، و يدوروا لنفسهم علي ألف عذر للغلك و يفوتوا ، و يدورولك حتي علي الصح و يتلككوا و يأذوك ..

ما بيتمنوش الخير لحد الا لو معاهم مصلحته ، و اول ما المصلحة تخلص، يبيعوك علي اول ناصية ..

جابوا منين القلب ده ؟؟ و موتوا ازاي ضميرهم ده و اقنعوه انهم بيعملوا الخير و هم أشر الأشرار ؟؟ و ازاي بيحطوا لتصرفاتهم كل التبرير ده ؟؟ و ازاي بيناموا بالليل و معاهم ضحكتهم و هما اللي قتلوا الضحك في الناس ؟؟ 

و ازاي بيلبسوا لاعمالهم عباية الحق و الدين و الأخلاق و عاوزينك تصدقهم زي ما هما مصدقين كدبهم؟؟ و ازاي يقبلوا يحضنوك في العلن و يشتموك و يشهروا بيك في السر ، و يمثلوا بالبراعة و الإتقان ده ؟؟

ما لهمش حل .. تدافع ما تدافع تعاتب ما تعاتب تشرح ما تشرح كله محصل بعضه!! 

حلهم بس سماوي الهي ، انك ترفع قضيتك للسما و تختصمهم أمام محكمة الله العادلة،  و ما اعدلها .. 

و ربنا بينظر في قضيتك في الحال و بيمضيلك علي ٣ قرارات نافذة..

بيحول مظلمتك لتعويضات مضاعفة ، خدوا منك فلوس يردهالك فلوس ، و الافضل حاجات ما تعملهاش الفلوس : رزق و صحة و حمايتك من مشاكل و حب و مكانة عند الناس ، و طاعة الولاد و نجاحهم في الدراسة و الزواج و قبل ده كله الستر ثم الستر ثم الستر ..

و القرار التاني يطلق عليهم نفوسهم فيدوقوا نفس اللي عملوه فيك و اكتر شوية ، و يرفع عنهم ستره ، يا يرجعولك حقك يا يشربوه نار و مرار ..

 اللي عند ربنا محفوظ ما ببضيعش..

ناس قلابة و سما وهابة..