متقوليش يا لاسع

متقوليش يا لاسع!
ده جملة سمعتها في حوار قدامي مابين الاسطي مجدي السواق وصاحب محل عطارة وعلافة مشهور وكان بيحاسبه حساب الاسبوع وعايز ياكل عليه حقه فبيهزر معاه وقاله:خد دول يالاسع والأسبوع الجاي ازودك
فرد متقوليش يالاسع وهاتهم وشوف لك سواق من اول الاسبوع الجاي
ومشي وروح بيته وفعلا بعد الاجازة الأسبوعية منزلش مع العطار وابتدأ كل يوم يسأل في المنطقة علي شغل؛في اللي كان يقوله تعالي اتفضل ويقابله حلو في الاول وبعد ٣ايام بقينا نسمع في المنطقة نفس المشكلة ويقوله متقوليش يالاسع تاني ومن الاسبوع الجاي شوف لك حد غيري!
ولما سمعتها اخر مرة صعب عليا فاتكلمت معاه وقلت له:يااسطي مجدي انت مليكش شغل هنا في المنطقة تاني لان الناس هنا مش كويسة ونصحته بمكتب العمل يروح يسال علي وظيفة هناك
وبعد٥سنين وانا بتمشي في وسط البلد ببص علي المحلات لاقيت الاسطي مجدي طالع من محل كبير مشهور وبيكلم صاحب المحل وبيقوله:خلاص النوعين دول هجيبهملك المرة الجاية وجرب براند الشامبو الجديد ده هيعجبك جدا،وأول مابص ولاقاني اخدني بالحضن وقالي:اهلًا بسبب الخير
قلتله:انت واحشني جدا طمني عليك؟
قاله:الله يبارك لك عملت زي ماانت قلت لي وربنا كرمني مع واحد كنت بشتغل معاه سواق علمني شغل المستلزمات والعطور ودلوقتي سيبته واشتغلت مع حالي.
قلتله:مبسوط؟
قاله:الحمدلله واللي ناقصني بكلم الراجل اللي كنت بسوق له واغذي بيه السوق وكفاية اني عزلت من المنطقة
#صديق وصاني علي الخاص انزلها علشان الأصدقاء يحكموا مين اللي لاسع المنطقة ولا مجدي السواق؟!